Serikali Yaongeza Juhudi za Kuimarisha Usalama wa Chakula na Kilimo Pwani.

                                   


Serikali imezindua mkakati wa kuimarisha uzalishaji wa kilimo, uchakataji, biashara na usafirishaji katika eneo la Pwani kupitia mpango wa “From Farm to Port” (Shamba hadi Bandarini).

Akizungumza Alhamisi, Septemba 3, 2026, wakati wa ufunguzi rasmi wa Mombasa International Show katika uwanja wa Mkomani Showgrounds, Waziri wa Kilimo na Maendeleo ya Mifugo, Seneta Mutahi Kagwe, amesema mpango huo unalenga kuunganisha uzalishaji wa mazao katika kaunti za Pwani na masoko ya ndani na kimataifa.

Kwa mujibu wa Kagwe, kaunti za Kwale, Kilifi, Taita Taveta na Tana River zitazingatia uzalishaji wa kilimo na kuongeza thamani ya bidhaa, huku Mombasa na Lamu zikitumika kama vituo muhimu vya usafirishaji na ugavi vinavyounganisha eneo hilo na Kenya, Afrika Mashariki na masoko ya dunia.

Kagwe amesema kaunti za Pwani bado hazijatumia kikamilifu uwezo wao wa kilimo na ufugaji, akitaja korosho, nazi, mihogo, pamba, maziwa na nyama miongoni mwa bidhaa zinazoweza kuongeza uzalishaji mara tatu au hata mara nne.

                                  

Akisema Serikali na washirika wake wamekuwa wakitekeleza mipango ya kufufua uchumi wa Pwani, huku uwekezaji mpya ukitarajiwa kuongeza ajira na fursa za biashara.

Akisema mwekezaji kutoka Uswizi anawekeza katika kituo cha thamani ya mamilioni ya fedha katika Dongo Kundu Special Economic Zone, kwa ajili ya uzalishaji wa bidhaa mpya za chai.

Pia, mpango wa kibiashara wa ardhi ya ekari milioni moja huko Galana Kulalu unaendelea, huku kampuni binafsi zikiwa tayari zimewekeza takribani bilioni 9 katika ujenzi wa miundombinu na uzalishaji wa mahindi, vitunguu, njegere na karoti.

Serikali pia imeimarisha juhudi za kufufua sekta ya korosho kupitia usambazaji wa miche yenye ruzuku kwa lengo la kuongeza mashamba, uzalishaji, uchakataji na mapato ya wakulima.

                                       

Kagwe amesema mwaka 2025, eneo linalolimwa korosho liliongezeka kwa zaidi ya hekta 1,900, huku uzalishaji ukiongezeka kwa tani 588 hadi kufikia tani 8,397, zenye thamani ya Sh546 milioni.

Kwa upande wa nazi, alisema sekta hiyo inatoa ajira na riziki kwa zaidi ya familia 100,000 za wakulima katika Pwani.

Serikali inalenga kuongeza thamani ya nazi kupitia bidhaa kama mafuta ya nazi, maji ya nazi, unga wa nazi, krimu na maziwa ya nazi. Mwaka 2025, zaidi ya tani 100,000 za nazi zilitolewa zikiwa na thamani ya zaidi ya Sh10.8 bilioni.

Kagwe amesema eneo linalolimwa pamba limeongezeka kutoka hekta 8,579 mwaka 2022 hadi hekta 18,852 mwaka 2026.

Uzalishaji umeongezeka kutoka marobota 6,779 ya kilo 185 mwaka 2022 hadi marobota 15,892 mwaka 2026, huku wakulima wakipata mapato ya takribani Sh697 milioni mwaka huo.

Serikali inalenga kuongeza uwekezaji katika mnyororo wa thamani wa pamba ili kupunguza uagizaji wa vitambaa kwa asilimia 50 na kuongeza mauzo ya nje hadi Sh150 bilioni kufikia mwaka 2027.

                                     

Serikali imetangaza kupunguza gharama ya mbolea yenye ruzuku kutoka Sh2,500 hadi Sh2,000 kwa mfuko wa kilo 50, pamoja na kutoa ruzuku kwa mbegu za mahindi.

Hatua hiyo inakuja wakati Serikali ikikadiria kuwa uzalishaji wa mahindi wa mwaka 2026 unaweza kusababisha upungufu wa kitaifa wa magunia 42,580,768 ya kilo 90.

Serikali pia imesema kupitia NCPB itawezesha uagizaji wa mahindi kutoka nje ili kuhakikisha usalama wa chakula na kuwalinda walaji dhidi ya ongezeko la bei linaloweza kusababishwa na upungufu wa uzalishaji.

Licha ya hatua zilizochukuliwa, Waziri Kagwe amesema wakulima wa Pwani bado wanakabiliwa na changamoto kama mvua zisizotabirika, gharama kubwa za pembejeo, kupungua kwa rutuba ya udongo na wadudu waharibifu.

Changamoto nyingine ni miundombinu duni, ukosefu wa mikopo ya kutosha na kupungua kwa ukubwa wa mashamba.

                                    

Serikali, kwa kushirikiana na kaunti, inalenga kukabiliana na changamoto hizo kupitia umwagiliaji, kilimo kinachozingatia mabadiliko ya tabianchi, udhibiti wa magonjwa na wadudu pamoja na kuongeza upatikanaji wa pembejeo.

Mipango mingine ni pamoja na kuendeleza minyororo ya thamani ya nazi, korosho, maembe, pamba na sukari, kuimarisha kilimo cha mpunga na umwagiliaji Tana River na Kwale, biashara ya mifugo Taita Taveta, Kwale na Lamu, pamoja na programu za uvuvi na ufugaji wa samaki.

Kagwe akisema Serikali pia itaendelea kuunga mkono vituo vya uchakataji wa mazao na matumizi ya County Aggregation and Industrial Parks ili kuongeza thamani ya mazao kabla ya kufikishwa sokoni.

Mombasa International Show ya mwaka huu inaendeshwa chini ya kaulimbiu “Promoting Climate Smart Agriculture and Trade Initiatives for Sustainable Economic Growth”, inayolenga kukuza kilimo kinachozingatia mabadiliko ya tabianchi na biashara kwa ajili ya ukuaji endelevu wa uchumi. 

Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more