Serikali yaharakisha utekelezaji wa mradi wa bilioni 75 WA Dongo Kundu,Yalenga ukamilike 2028.

 
    
Serikali imeongeza kasi ya utekelezaji wa mradi wa Dongo Kundu Special Economic Zone (SEZ),huku wawekezaji 94 wakiwa wamewasilisha maombi ya kuwekeza katika eneo hilo.

Katibu katika Wizara ya Uchukuzi, Mohamed Daghar amesema zaidi ya taasisi 10 za serikali zimefanya ukaguzi wa mradi huo wa kimkakati ili kutathmini maendeleo yake na kushughulikia changamoto zinazoweza kuchelewesha utekelezaji wake.

Amesema mradi huo wenye thamani ya Shilingi Bilioni 75 unahusisha ujenzi wa gati, barabara, miundombinu ya umeme na maji.

Mamlaka ya Bandari Nchini (KPA) inajenga gati la kwanza kati ya saba, lenye urefu wa mita 300, ambalo litawezesha meli kubwa ikiwemo Panamax kutia nanga katika eneo hilo.
    

Kwa sasa, ujenzi wa gati hilo umefikia asilimia 16, huku KPA ikisema kazi iko mbele ya ratiba kwa takribani asilimia mbili.Mradi huo unatarajiwa kukamilika ifikapo Desemba 2028,ila serikali inalenga kuharakisha utekelezaji wake ukamilike mapema. 

Mradi huo pia unahusisha ujenzi wa barabara yenye urefu wa kilomita 4.6, njia panda ya kilomita 2.8 huku KETRACO inatarajiwa kujenga njia ya kusafirisha umeme yenye urefu wa kilomita 51 kutoka Mariakani, ikiwa na uwezo wa 220kV na mfumo wa double circuit.

Serikali pia inatekeleza mradi wa maji kutoka Tiwi, Kaunti ya Kwale, pamoja na kuunganisha maji kutoka bwawa la Mwache.
Dongo Kundu yote inakalia takribani ekari 3,000, huku eneo la Mombasa Special Economic Zone likichukua takribani ekari 1,700.
     

Baadhi ya wawekezaji tayari wameanza shughuli zao, akiwemo Taifa Gas, ambayo inakaribia kukamilisha ujenzi wa kiwanda chake cha gesi.

Wawekezaji wengine wameonyesha nia ya kuanzisha kiwanda cha chuma, kiwanda cha vioo, kituo cha kuhifadhi bidhaa kwa baridi pamoja na shughuli nyingine za kibiashara na kiviwanda.

Mohamed amesema serikali pia ina mfumo wa uwekezaji na Afreximbank unaolenga kuvutia takribani dola bilioni moja za uwekezaji na kuchochea uwekezaji wa moja kwa moja kutoka nje.

Mkurugenzi Mkuu wa KPA Capt William Ruto, amesema mkandarasi anayetekeleza ujenzi wa gati yuko mbele ya ratiba na serikali inalenga kuhakikisha mradi unakamilika kwa wakati au kabla ya muda uliowekwa.
   

Ruto amesema kati ya wawekezaji 94 waliowasilisha maombi, takribani wanne tayari wamechukua maeneo, huku wengine wakisubiri kukamilika kwa gati ili kuanza uzalishaji na usafirishaji wa bidhaa.

Serikali inatarajia Dongo Kundu SEZ kuwa kitovu cha viwanda, biashara na usafirishaji, huku bidhaa zitakazozalishwa katika eneo hilo zikisafirishwa kupitia Bandari ya Mombasa kwenda masoko ya ndani, Afrika Mashariki na kimataifa.

Mradi huo unatarajiwa pia kuongeza shughuli za Bandari ya Mombasa, kuvutia uwekezaji wa kigeni na kutoa maelfu ya ajira kwa Wakenya katika sekta mbalimbali.
        


Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more