Serikali Yashinikizwa Kutunga Sheria kudhibiti swala la watu Kutoweka

                                  

Wanaharakati wa haki za binadamu na mashirika ya kiraia wametoa wito kwa Serikali na Bunge kutunga sheria inayotambua na kuifanya kuwa kosa la jinai vitendo vya watu kutoweka nchini Kenya.

Wito huo umetolewa wakati wa hafla ya kuadhimisha siku ya kimataifa ya uhamasishaji kuhusu watu wanaotoweka, huku wadau wakitaka hatua zaidi zichukuliwe kulinda waathiriwa na familia zao.

Wangeshi Grace Kahuria kutoka IMLU, ambaye pia ni mwanachama wa Muungano wa Missing Voices Coalition na mratibu wa Police Reforms Working Group, amesema mamia ya visa vya watu waliopoteza maisha au kutoweka vimeripotiwa nchini kwa miaka kadhaa.

Kahuria amesema visa 38 viliripotiwa mwaka 2019, 10 mwaka 2020, 36 mwaka 2021, 22 mwaka 2022, 10 mwaka 2023, zaidi ya 50 mwaka 2024 na visa sita mwaka 2025.

Amesema hadi kufikia Agosti mwaka huu, visa 19 tayari vimeripotiwa.

                              

Kahuria amesema familia za watu waliotoweka au wale ambao miili yao imepatikana baada ya kuuawa zinaendelea kukabiliwa na changamoto kubwa za kihisia na kifedha huku serikali bado ikiwa haijawapatia fidia.

Ametaka kukomeshwa kabisa visa vya watu  kutoweka, huku akitaka Serikali kutoa huduma na msaada kwa familia zilizoathiriwa na vitendo vya ukatili.

Aidha, ameitaka Serikali kuacha mashirika kama Kenya National Commission on Human Rights pamoja na Victims Protection Agency kufanya kazi huru ili taasisi hizo ziweze kutekeleza majukumu yao ipasavyo na kuwasaidia waathiriwa.

Kwa upande wake Mwenyekiti wa shirika la MUHURI, Khelef Khalifa,amekosoa matumizi ya nguvu kupita kiasi dhidi ya raia na kutaka maafisa wa polisi wawajibishwe kwa ukiukaji wa haki za binadamu.

Khalifa pia amekosoa kauli ya Rais William Ruto kuhusu polisi kuwapiga risasi waandamanaji miguuni, kuwapeleka hospitalini na kisha kukabiliwa na kifungo.

Akisema kauli kama hiyo zinaweza kuchochea matumizi ya nguvu kupita kiasi dhidi ya raia wasio na silaha.

“Rais amekosea. Anawahimiza polisi kutumia nguvu na kuwaua raia wasio na silaha,” amesema Khalifa.

                                       

Amesema watu waliotoweka wanapaswa kutafutwa na waliohusika na kutoweka kwao kuchukuliwa hatua za kisheria.

Akisisitiza kuwa mtu anayeshukiwa kufanya uhalifu anapaswa kukamatwa na kufikishwa mahakamani, badala ya polisi kuchukua sheria mikononi mwao.

“Ikiwa mtu amefanya uhalifu, anapaswa kufikishwa mahakamani na mahakama ndiyo iamue hatua ya kuchukuliwa dhidi yake. Si jukumu la polisi kuchukua sheria mikononi mwao,” amesema.

Aidha, amewataka maafisa wa polisi kuacha kutumiwa kisiasa na badala yake kutekeleza majukumu yao kwa mujibu wa sheria.

“Polisi wanapaswa kuacha kufuata wanasiasa. Wajibu wao ni kufanya kazi kwa mujibu wa sheria,” amesema.

Nae Mkurugenzi  wa International Justice Mission (IJM) nchini  Vincent Chahale, amesema siku hiyo ni muhimu katika juhudi za kukabiliana na tatizo la watu kutoweshwa kwa kulazimishwa nchini.

Chahale ametangaza kuzinduliwa kwa kampeni ya “Haki Kwa Wote”, inayolenga kushinikiza mageuzi ya kisheria na kitaasisi ili kulinda waathiriwa na familia zao.

Amesema kampeni hiyo inalenga mambo mawili makuu; kwanza, kushinikiza Serikali na Bunge kutunga sheria inayofanya kutoweka kwa kulazimishwa kuwa kosa la jinai.

Pia kampeni hiyo inalenga kuhakikisha sheria hiyo inapitishwa ifikapo katikati ya mwaka ujao.

“Kwa miaka mingi tumekuwa na visa vya watu kutoweka, hasa wakati wa uchaguzi na maandamano, lakini bado hatuna sheria inayofanya kitendo hicho kuwa kosa la jinai,” amesema Chahale.

                                          

Lengo la pili la kampeni hiyo ni kuhakikisha utekelezaji kamili wa Sheria ya Ulinzi wa Waathiriwa (Victim Protection Act).

Akisema hakuna maana ya kuwa na sheria ambayo haitekelezwi ipasavyo.

Kampeni ya Haki Kwa Wote inawaleta pamoja wadau wa haki za binadamu na washirika wengine wanaotaka kuona uwajibikaji zaidi, haki na ulinzi kwa waathiriwa wa kutoweka pamoja na familia zao.

Wadau hao wamesema Serikali inapaswa kuimarisha mifumo ya kisheria na taasisi ili kuhakikisha waathiriwa wanapata haki na waliohusika na ukiukaji wa haki za binadamu wanawajibishwa.

Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more