Zaidi ya familia 800 zaachwa bila makazi baada ya Nyumba 170 Kubomolewa Changamwe.

Viongozi katika kaunti ya Mombasa wamekemea ubomoaji wa nyumba 170 katika makazi ya Kitaifa ya Changamwe National Housing Estate ulioacha zaidi ya familia 800 bila makazi.

Viongozi hao wakiongozwa na Mbunge wa Changamwe Omar Mwinyi wakisema hatua hiyo ilifanyika licha ya kuwepo kwa amri ya mahakama kuzuia ubomozi. Viongozi hao wameonya kuwa uongozi wa ODM unaweza kutathmini upya uungaji mkono wake kwa serikali ya ushirikiano mpana (Broad-Based Government) kutokana na kile walichokitaja kuwa ni kupuuzwa kwa utawala wa sheria.

                          

Zaidi ya familia 800 zilivamiwa na msafara mkubwa wa maafisa wa polisi alfajiri ya leo wakati serikali ikianza utekelezaji wa mpango wa kubomoa nyumba hizo ili kupisha mradi wa ujenzi upya wa makazi hayo.

Juhudi za viongozi wa eneo hilo kuwasihi polisi wawape wakazi muda wa kuokoa mali zao hazikufaulu, huku tingatinga likianza kubomoa nyumba hizo na kuwaacha wakaazi  bila usaidizi.

Wakati huo huo, polisi wa kutuliza ghasia walirusha mabomu ya kutoa machozi kuwatawanya wakazi pamoja na viongozi waliokuwa wakipinga ubomoaji huo.

                          

Mbunge wa Changamwe, Omar Mwinyi, amesema maafisa wa Shirika la Taifa la Nyumba walitoa notisi ya mwezi mmoja ya kuhama bila kuwashirikisha viongozi wa eneo wala kufanya ushirikishwaji wa umma.

"Tulitaka mazungumzo lakini walikataa. Tulienda mahakamani mara mbili na tukapata amri za kusitisha ubomoaji," amesema Mwinyi.

Ameweka wazi kuwa wapangaji 34 walilipwa fedha za kuhamia makazi mengine kati ya shilingi 4,000 na 10,000, kiasi alichokitaja kuwa ni kidogo mno na dharau kwa wakazi ambao wengi wameishi katika makazi hayo kwa zaidi ya miaka 30.

                          

Mbunge huyo amesema wakazi walipaswa kushirikishwa kikamilifu katika mchakato huo, akibainisha kuwa watoto wengi wanasoma katika shule za jirani na kuwa ubomoaji wa ghafla utavuruga masomo yao, hasa wanaojiandaa na mitihani ya kitaifa.

Aidha, amewashutumu polisi kwa madai ya kuwasili na watu aliowaita wahuni kutoka eneo jirani, akidai kuwa baadhi yao waliiba mali za wakazi kabla ya kukamatwa na kushambuliwa na wananchi wenye hasira.

"Tuliamini kuwa katika serikali ya ushirikiano mpana tungehusishwa na kushauriwa kuhusu masuala yanayohusu maeneo yetu. Lakini kinachoendelea kinaonyesha huenda bado tuko upinzani. Kama tungekuwa serikalini, tusingeadhibiwa pamoja na wananchi wetu," amesema Mwinyi.

                      

Kwa upande wake, Seneta wa Mombasa Mohamed Faki ameema ni jambo la kushangaza kuwa Kenya ni miongoni mwa nchi zilizotia saini mikataba ya kimataifa inayopinga uhamishaji wa watu kwa nguvu, lakini bado wakazi walifurushwa licha ya kuwepo kwa amri halali ya mahakama.

"Ikiwa Shirika la Taifa la Nyumba liko juu ya sheria, wananchi waambiwe. Ikiwa Polisi wako juu ya sheria, hilo pia lielezwe, kwa sababu haiwezekani amri ya mahakama ipuuzwe," amesema Faki.

Ameongeza kuwa mamlaka husika zilipaswa kushirikisha viongozi wa eneo hilo ili kupata suluhisho la maelewano badala ya kutumia nguvu.

                  

Mwenyekiti wa wapangaji, Meshack Okeyo, amesema wakazi hawapingi miradi ya maendeleo ya serikali, akieleza kuwa walikuwa wamekubaliana na maafisa wa Idara ya Makazi kusitisha notisi za kuhama, lakini walishtuka kuamka na kukuta polisi wakisimamia ubomoaji huo.

"Tunaunga mkono miradi ya serikali, lakini uhamishaji wa wananchi unapaswa kufanyika kwa njia ya kibinadamu. Zoezi hili lisitishwe ili mazungumzo yafanyike. Hatutaki mtu yeyote aumie," alisema Okeyo.

Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more