Serikali ya kaunti ya Mombasa Yazindua Kozi Mpya Kuimarisha Uchumi wa Bahari na Ajira kwa Vijana

                         

Serikali ya Kaunti ya Mombasa imezindua kozi mpya za mafunzo ya ufundi katika chuo cha Ufundi cha Mtongwe kwa lengo la kuwapa vijana ujuzi wa vitendo utakaowawezesha kupata ajira katika sekta ya uchumi samawati na maeneo mengine yanayokua kwa kasi pamoja na  kituo cha kulelea watoto na maeneo ya michezo ili kuwasaidia wazazi vijana, hususan akina mama, kuendelea na masomo yao.

Akizungumza wakati wa uzinduzi huo Gavana wa kaunti ya Mombasa Abdullswamad Sheriff Nassir amesema serikali ya kaunti imejizatiti kuhakikisha mafunzo ya ufundi yanakuwa njia ya moja kwa moja kuelekea ajira kwa kuimarisha ushirikiano na sekta binafsi pamoja na kupanua programu za ukuzaji wa ujuzi.

Akisema kuwa vyuo vyote vya ufundi vinavyotaka kushirikiana na serikali ya kaunti vitakutana wiki hii katika eneo la Tononoka ili kuandaa mfumo wa kuwaandaa vijana kwa ajira kupitia programu za maendeleo ya ujuzi katika jamii "SKILLS MTAANI".

                  

Abdulswamad pia ameagiza Idara ya Elimu kuhakikisha wanafunzi wa Mombasa wanapewa kipaumbele katika vyuo vya ufundi vya kaunti na kuahidi kuwa serikali itaendelea kuweka mafunzo hayo karibu na wananchi na kwa gharama nafuu.

Akiweka wazi kuwa wahitimu wa vyuo vya ufundi vya kaunti watapewa kipaumbele katika nafasi za mafunzo kwa vitendo (attachments), mafunzo kazini (internships) na ajira ndani ya serikali ya kaunti pale nafasi zitakapopatikana.

Gavana huyo akisema kuwa serikali ya kaunti itashirikiana na kampuni binafsi ili kuajiri wahitimu hao, huku ikichunguza uwezekano wa kutoa motisha kwa kampuni zitakazoajiri vijana waliopata mafunzo katika vyuo vya Mombasa.

                  

Kwa wahitimu watakaochagua kujiajiri, gavana amesema hazina ya pesa ya mikopo ya mzunguko (Mombasa County Revolving Fund) utawasaidia kwa kugharamia ununuzi wa zana na vifaa muhimu vya kuanzisha biashara zao.

Kwa upande wake waziri wa elimu katika kaunti ya Mombasa Dkt. Mbwarali Kame, amesema kaunti inalenga kuvifanya vyuo vya ufundi kuwa vituo vya ubora vinavyowaandaa vijana kwa fursa zinazotokana na uchumi wa samawati.

                

Amesema kozi hizo zimeandaliwa kukidhi mahitaji ya sekta zinazohusiana na usafiri wa baharini, Bandari ya Mombasa, utalii wa hoteli na huduma za baharini, ili kuhakikisha vijana ambao hawajiungi na vyuo vikuu wanapata ujuzi unaohitajika sokoni.

“Lengo letu ni kukifanya Chuo cha Mtongwe kuwa kitovu cha ubora katika mafunzo ya masuala ya baharini ili vijana wetu wanufaike na fursa za uchumi wa samawati,” amesema Dkt. Kame.

Aidha, amesema vituo vya kulelea watoto vitawasaidia akina mama vijana walioathiriwa na mimba za utotoni au ndoa za mapema kuendelea na masomo yao bila kulazimika kuyaacha

             

Kozi hizo mpya ni pamoja na Ujenzi na Ukarabati wa Boti, Ufundi wa Majokofu na Viyoyozi, Huduma za Malazi na Utunzaji wa Nyumba, pamoja na Teknolojia ya Uokaji Mikate na Keki. 

Washikadau katika sekta ya elimu wamesema uwekezaji huo unalenga kuimarisha elimu ya ufundi, kuongeza upatikanaji wa mafunzo ya vitendo na kuunda fursa zaidi za ajira na ujasiriamali kwa vijana kote Mombasa.

Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more