KRA Yateketeza Bidhaa Haramu zenye Thamani ya Shilingi Milioni 218.


Mamlaka ya ukusanyaji ushuru nchini (KRA), kwa ushirikiano na taasisi mbalimbali za kiusalama, imeteketeza bidhaa haramu zenye thamani ya Shilingi milioni 218 zilizokamatwa katika operesheni zilizofanyika jijini Nairobi na eneo la Pwani.

Uteketezaji huo ulifanyika kwa wakati mmoja katika kampuni ya Envirosafe Limited iliyoko EPZ Athi River, Nairobi, na katika eneo maalumu la Voi, Kaunti ya Taita Taveta. Bidhaa zilizoteketezwa zilijumuisha aina mbalimbali za bia, pombe kali na maji ya chupa ambazo zilikuwa zimekamatwa kupitia ukaguzi wa soko na operesheni za utekelezaji.

Uchunguzi umebaini kuwa bidhaa hizo zilikiuka sheria mbalimbali zinazodhibiti utengenezaji, uagizaji na uuzaji wa bidhaa zinazotozwa ushuru wa bidhaa. Baadhi ya ukiukaji huo ni pamoja na matumizi ya stempu bandia za ushuru, matumizi ya stempu zilizobadilishwa au ambazo hazijaamilishwa, uzalishaji haramu na wazalishaji wasio na leseni, pamoja na mbinu nyingine za kukwepa kulipa ushuru.

                                         

KRA imesema uteketezaji huo unaonyesha dhamira yake ya kulinda watumiaji, kulinda mapato ya serikali, kuhakikisha ushindani wa haki na kuvunja mitandao ya biashara haramu inayodhoofisha uchumi wa Kenya.

Akizungumza wakati wa zoezi hilo, Meneja Mkuu wa Walipa Kodi Wadogo na wa Kati, Michael Gichuki, amesema operesheni hiyo ni sehemu ya mkakati mpana wa KRA wa kulinda wafanyabiashara wanaofuata sheria na kudumisha uadilifu wa mfumo wa kodi nchini.

Amesema hatua hizo zinalenga kulinda afya, usalama na ustawi wa kiuchumi wa Wakenya, na si kuwaadhibu wafanyabiashara wanaofuata sheria. Akiongeza kuwa kuondoa biashara haramu kunasaidia kuunda mazingira salama na yenye ushindani wa haki kwa wafanyabiashara wanaolipa kodi ipasavyo.

                                         

Gichuki amebainisha kuwa biashara haramu ni tishio kubwa kwa uchumi wa Kenya kwani husababisha upotevu mkubwa wa mapato ya serikali na kuwaweka watumiaji katika hatari ya kutumia bidhaa zisizokidhi viwango vya ubora na usalama. Bidhaa nyingi bandia hutengenezwa katika mazingira yasiyo salama na bila usimamizi wa mamlaka husika.

Aidha, biashara haramu huwadhuru wazalishaji halali kwa kuleta ushindani usio wa haki, kuhatarisha ajira, kupunguza uwekezaji na kudhoofisha ukuaji wa viwanda. Kila bidhaa bandia inayouzwa humaanisha serikali inapoteza mapato ambayo yangetumika kuboresha huduma muhimu kama afya, elimu, miundombinu na usalama.

Mamalaka hiyo pia imewahimiza wafanyabiashara na wananchi kutumia Programu ya SOMA Label, inayopatikana bila malipo kupitia Apple App Store na Google Play Store, ili kuthibitisha uhalali wa stempu za ushuru kabla ya kununua bidhaa zinazotozwa ushuru.

                                     

Mamlaka hiyo imesisitiza kuwa itaendelea kushirikiana na taasisi nyingine katika kupambana na biashara haramu, kulinda watumiaji, kuongeza mapato ya serikali, kuhakikisha ushindani wa haki na kuweka mazingira bora kwa biashara halali kwa mujibu wa sheria za kodi na kanuni za Kenya. 

Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more