KENYA YAVUNJA REKODI YA DUNIA KWA UPANDAJI WA MIKOKO MOMBASA


Kenya imevunja Rekodi ya Dunia ya Guinness ya kuwa na idadi kubwa zaidi ya watu wanaopanda miti ya mikoko kwa wakati mmoja, katika zoezi lililofanyika Jomvu, Kaunti ya Mombasa.

Jumla ya watu 4,196, wakiwemo maskauti, wanajamii na wahifadhi wa mazingira, walishiriki zoezi hilo. Kati yao, 4,124 walitimiza masharti ya Guinness World Records, na hivyo kuvuka kiwango cha awali cha washiriki 3,001.

Mafanikio hayo yanaunga mkono juhudi za serikali za kupanda miti bilioni 15 ifikapo mwaka 2032, huku yakilenga pia kurejesha mifumo ya ikolojia ya pwani na kukabiliana na mabadiliko ya tabianchi.
          

Zoezi hilo liliongozwa na Huduma ya Misitu Nchini (KFS), Chama cha Maskauti Kenya na M-PESA Foundation, kwa kushirikiana na jamii pamoja na wadau wengine wa mazingira.

Tukio hilo limefanyika chini ya kaulimbiu “Mikoko yenye Afya kwa Uchumi Endelevu wa Buluu na Ustahimilivu wa Tabianchi,” likisisitiza umuhimu wa mikoko katika kulinda mazingira ya pwani, bioanuwai na maisha ya jamii.

Akizungumza baada ya rekodi hiyo kuthibitishwa, Naibu Mkuu Mwandamizi wa Wahifadhi wa Misitu katika Huduma ya Misitu Nchini (KFS), Clement Ng’oriareng, amesema zaidi ya skauti 5,000 kutoka maeneo mbalimbali nchini walijitokeza kushiriki katika jaribio hilo la kihistoria.
                              
Hata hivyo, baada ya mchakato wa uhakiki kufanywa kwa kuzingatia vigezo vya Guinness World Records, jumla ya washiriki 4,124 walitambuliwa rasmi, hatua iliyoiwezesha Kenya kuweka rekodi hiyo ya dunia.

Kwa upande wake, Mkurugenzi Mkuu wa Chama cha Skauti Kenya, Moses Danda, amesema mafanikio hayo ni ushahidi wa uwezo wa vijana wa Kenya kuongoza juhudi za uhifadhi wa mazingira na kukabiliana na athari za mabadiliko ya tabianchi.
                       
Danda akisema rekodi hiyo si tu mafanikio ya Kenya katika jukwaa la kimataifa, bali pia ni ishara ya uwezo wa vijana kuendesha kampeni za kimazingira zenye matokeo makubwa.

Akiongeza kuwa wanajivunia kuwa sehemu ya historia hiyo, akisisitiza kuwa zoezi hilo limeweka msingi muhimu wa kulinda mazingira kwa manufaa ya kizazi cha sasa na vizazi vijavyo.

Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more