KAUNTI YA MOMBASA YAREJESHA MRADI WA "SKILLS MTAANI", ZAIDI YA TAASISI 400 ZA MAFUNZO ZASAJILIWA

       

Serikali ya Kaunti ya Mombasa imesajili zaidi ya taasisi 400 za mafunzo zitakazoshirikiana na kaunti hiyo katika utekelezaji wa mpango wa Elimu Scheme – Skills Mtaani, unaolenga kuwapa vijana ujuzi wa ufundi na kuwawezesha kujiajiri.

Mpango huo unalenga kuunganisha maelfu ya vijana wanaotafuta ujuzi na taasisi zenye uwezo wa kutoa mafunzo ya vitendo yanayokidhi mahitaji ya soko la ajira.

Kupitia mpango wa Skills Mtaani, vijana watanufaika na mafunzo katika fani mbalimbali ikiwemo utengenezaji wa mikate na keki, urembo na henna, useremala, ushonaji na ubunifu wa mavazi, mabomba, ufundi wa umeme, uchomeleaji vyuma, ufundi wa magari, teknolojia ya habari na mawasiliano (ICT), pamoja na taaluma nyingine.

Serikali ya kaunti imesema mpango huo ni uwekezaji katika kuwawezesha vijana kiuchumi, kuwapa fursa za kujitegemea na kuimarisha maendeleo ya Mombasa kwa kupeleka mafunzo karibu na jamii.

Akizungumza wakati wa hafla hiyo Gavana wa Kaunti ya Mombasa, Abdulswamad Sheriff Nassir, amesema kaunti ya Mombasa na Kenya Kwa jumla kuna idadi kubwa ya vijana wasio na ajira, hivyo kuna haja ya kuwapa ujuzi na fursa za kujipatia kipato. 

         

Amesema fedha za kutekeleza mpango wa Skills Mtaani tayari zimetengwa, na sasa juhudi zinaelekezwa katika kuharakisha utekelezaji wake ili vijana waanze kunufaika bila kuchelewa.

Abdulswamad amevitaka vyuo vya mafunzo ambavyo bado havijasajiliwa na serikali kukamilisha usajili wao haraka ili vipate nafasi ya kushiriki katika mradi huo. Akisema hatua hiyo pia itasaidia kuhakikisha matumizi ya fedha za umma yanafanyika kwa uwazi na uwajibikaji, kwa kuwa fedha zitaelekezwa kwa taasisi zinazotambuliwa rasmi na serikali. Ameongeza kuwa Idara ya Elimu ya Kaunti itazisaidia taasisi hizo kukamilisha taratibu zote za usajili.

Aidha, vyuo vitasaini mikataba na Serikali ya Kaunti ya Mombasa, huku vijana wakipewa nafasi ya kuchagua chuo na kozi wanazotaka kusomea. Maombi ya kujiunga na mpango huo yatafanywa kupitia mfumo wa mtandaoni, na Gavana Abdulswamad amesisitiza kuwa hakutakuwa na upendeleo katika mchakato wa uchaguzi. 

       

Gavana Abdulswamad Sharif Nassir amesema serikali ya kaunti itafuatilia mahudhurio ya wanafunzi watakaochaguliwa ili kuhakikisha wanahudhuria mafunzo na kupata ujuzi unaotarajiwa. Baada ya kuhitimu, baadhi ya wahitimu watasaidiwa kupata vifaa vya kuanzisha shughuli za kujiajiri kulingana na taaluma walizosomea, pamoja na kusaidiwa kutafuta nafasi za ajira ndani na nje ya nchi.

Gavana Nassir amewahimiza vijana kutuma maombi ya kujiunga na mradi huo, akisema utasaidia kupunguza ukosefu wa ajira, kuongeza fursa za kujiajiri na kuwaepusha vijana na uhalifu pamoja na matumizi ya dawa za kulevya.

    


Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more