Wito wa Ushirikiano Watolewa Katika Vita Dhidi ya Mihadarati Nchini.



                               

Huku ulimwengu ukiadhimisha siku ya kupinga matumizi na ulanguzi wa dawa za kulevya,hapa Mombasa siku hiyo imeadhimishwa katika eneo bunge la Jomvu katika kituo cha Miritini huku viongozi wakionya kuwa taifa linakabiliwa na dharura ya kitaifa kutokana na ongezeko la matumizi ya dawa za kulevya,wito ukitolewa kwa serikali za kaunti pamoja na serikali ya kitaifa kushirikiana kwa karibu ili kuimarisha vita dhidi ya mihadarati .

Kulingana na utafiti wa hivi karibuni wa kitaifa uliofanywa na Mamlaka ya Kitaifa ya Kupambana na Matumizi ya Pombe na Dawa za Kulevya (NACADA), takriban Wakenya milioni 4.7 wenye umri wa kati ya miaka 15 na 65 wanatumia angalau aina moja ya dawa za kulevya au kilevi.

Utafiti huo unaonyesha kuwa eneo la Pwani lina kiwango cha juu zaidi cha matumizi ya dawa za kulevya nchini kwa asilimia 29.3, huku Kaunti ya Mombasa ikiongoza kwa kiwango cha asilimia 34.4.

Akizungumza wakati wa maadhimisho ya Siku ya Kimataifa ya Kupinga Matumizi Mabaya ya Dawa za Kulevya na Biashara Haramu ya Dawa za Kulevya (IDADA) 2026, Katibu Mkuu katika Wizara ya Mambo ya Ndani, Dkt. Raymond Omollo, amesema Kenya inashuhudia mwelekeo mpya wa dawa za kulevya, ikiwemo kuanza kutengenezwa kwa dawa za kisasa ndani ya nchi.

                                         

Dkt. Omollo amesema kuwa ingawa mamlaka zimekuwa zikijikita katika kupambana na matumizi ya bangi na pombe, sasa wafanyabiashara wa dawa za kulevya wanatumia teknolojia kuzalisha dawa za kisasa nchini, jambo linalofanya iwe vigumu kuzibaini.

Katibu huyo Mkuu ameonya kuwa eneo la Pwani linaendelea kuwa kitovu kinachovutia wasafirishaji wa kimataifa wa dawa za kulevya kutokana na nafasi yake ya kijiografia, akiongeza kuwa magenge ya uhalifu yanatumia teknolojia ya kisasa na mitandao ya kimataifa kusafirisha dawa hizo haramu.

Amefichua kuwa mwaka uliopita vyombo vya usalama vilinasa dawa za kulevya zenye thamani ya shilingi bilioni 8.2, akisema huo ni miongoni mwa ukamataji mkubwa zaidi wa dawa za kulevya kuwahi kufanywa nchini.

                                       

Aidha, amewataka wazazi,taasisi za elimu, taasisi za kidini, mashirika ya kijamii na sekta binafsi kushirikiana kuimarisha juhudi za kuzuia matumizi ya dawa za kulevya, kutoa huduma za mapema, matibabu na urekebishaji wa waraibu ili kukabiliana na tatizo hilo.

Mkurugenzi mkuu wa NACADA Anthony Omerikwa amesema mapambano dhidi ya dawa za kulevya hayawezi kufanikiwa bila ushirikiano wa karibu kati ya serikali ya kitaifa, serikali za kaunti na jamii kwa ujumla.

 Ametoa wito wa kuimarishwa kwa kampeni za uhamasishaji katika jamii, shule na maeneo ya kazi ili kuongeza uelewa kuhusu madhara ya pombe na dawa za kulevya, akisisitiza kuwa ni jukumu la kila mmoja kuhakikisha vijana wanaokolewa kabla hawajapoteza kabisa mwelekeo wa maisha yao.

                                     

Kwa upande wake, Gavana wa Kaunti ya Mombasa, Abdulswamad Sharif Nassir, ameahidi kuimarisha ushirikiano na taasisi pamoja na mashirika yanayopambana na mihadarati ili kuokoa maisha ya vijana.

Gavana Nassir ameahidi kuchukua hatua kali dhidi ya wanaojihusisha na biashara ya dawa za kulevya na vileo haramu.

Amesema kuwa kupitia mazungumzo na mashauriano aliyofanya hivi karibuni na viongozi mbalimbali, imebainika kuwa vileo haramu vinauzwa kwa bei nafuu, jambo linalochochea matumizi yake na kuathiri maisha ya vijana wengi katika kaunti hiyo.

                                 

Nae seneta mteule katika kaunti ya Mombasa Miraj Abdillah  amesema ukanda wa Pwani kwa miaka mingi umekuwa ukikabiliwa na changamoto ya matumizi na biashara ya mihadarati.

Akibainisha kuwa kupitia ushirikiano kati ya Wizara ya Usalama wa Ndani, vyombo vya usalama na serikali ya kaunti, hatua kubwa zimepigwa katika kudhibiti tatizo hilo. Amesema juhudi hizo zimewaokoa vijana wengi kutoka katika uraibu wa dawa za kulevya na kuwapa fursa ya kujijenga upya na kuboresha maisha yao.


Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more