Spika wa bunge la kitaifa Moses Wetang’ula Akemea Siasa za Ukabila na Vurugu.

                                                                

                                          

Spika wa Bunge la Kitaifa, Moses Wetang'ula, amewataka Wakenya kujiepusha na siasa za ukabila na kukumbatia umoja wa kitaifa, akisema mustakabali wa nchi unategemea viongozi na wananchi kuweka maslahi ya taifa mbele badala ya tofauti za kikabila na kisiasa.

Akizungumza katika eneo la Likoni, Kaunti ya Mombasa, wakati wa hafla ya kuchangisha fedha kwa ajili ya Shirika la Kijamii la Salute (Salute CBO), Wetang'ula amesema maendeleo ya Kenya yatawezekana kupitia umoja, mshikamano na kuheshimu demokrasia.

"Nchi yetu ni kubwa kuliko mtu yeyote, na uongozi hutoka kwa Mungu. Lengo letu linapaswa kuwa kuunganisha taifa tunapoendelea kuelekea kuwa nchi yenye maendeleo makubwa," alisema.

                                       

Amesisitiza kuwa hakuna jamii iliyo kubwa au ndogo nchini Kenya na kwamba kila jamii ina haki ya kutoa viongozi wake. Aidha, alitoa wito kwa wanasiasa kudumisha siasa za heshima kwa kushindana kwa amani wakati wa uchaguzi na kukubali matokeo baada ya uchaguzi.

"Hakuna kabila kubwa wala dogo nchini Kenya. Kila jamii ina haki ya kuongoza taifa hili. Tunapaswa kudumisha siasa zenye staha ambapo tunashindana kwa nguvu wakati wa uchaguzi, lakini matokeo yanapotangazwa, tunakumbatiana na kufanya kazi pamoja kwa manufaa ya wote," alisema.

                                       

Spika huyo pia amekemea tabia inayoshuhudiwa ambapo baadhi ya wanasiasa wanadaiwa kudhamini na kutumia makundi ya wahuni kusababisha vurugu za kisiasa, akionya kuwa hali hiyo inahatarisha amani na utulivu uliopatikana kwa juhudi kubwa.

"Ni jambo la kusikitisha kuona baadhi ya wanasiasa wakiajiri wahuni kuvuruga amani yetu tuliyoijenga kwa gharama kubwa. Tunapaswa kukemea vitendo hivyo. Ikiwa wanahitaji wahuni, waajiri watoto wao wenyewe, si watoto wasio na hatia wa taifa hili," alisema.

Wetang'ula amempongeza aliyekuwa Waziri Mkuu Raila Odinga kwa kuweka maslahi ya taifa mbele baada ya uchaguzi mkuu wa mwaka 2022, akisema hatua hiyo ilichangia kuundwa kwa serikali jumuishi inayowapa viongozi kutoka pande mbalimbali za kisiasa nafasi ya kuhudumia taifa.

Wetangula pia ameeleza matumaini yake kuhusu mustakabali wa Kenya, akisema nchi iko katika mkondo wa ukuaji endelevu na ustawi wa kiuchumi. Akisema utawala wa Rais William Ruto umeweka msingi wa mageuzi ya kiuchumi huku taasisi za kidemokrasia zikiendelea kuimarika.

                                     

Naye Spika wa Seneti, Amason Kingi, ameunga mkono wito wa kukomeshwa kwa siasa za ukabila, akisema eneo la Pwani ni la watu wa tamaduni mbalimbali na haliwezi kuunga mkono siasa za mgawanyiko wa kikabila.

"Pwani ni eneo lenye watu wa asili na tamaduni tofauti. Hilo pekee linatupa sababu ya kuunga mkono serikali jumuishi. Kenya imepiga hatua kubwa katika kuondoa mfumo wa kale wa kuwagawa wananchi kwa misingi ya ukabila," alisema.

                                    

Kwa upande wake, Waziri wa Madini Hassan Joho alimshukuru Rais William Ruto kwa kuhakikisha Wakenya wote wanatendewa maendeleo  kwa usawa bila kujali kabila wala dini.

"Kwa miaka mingi, watu wetu walipuuzwa kiuchumi na kisiasa. Kwa mara ya kwanza, tumesimama kidete na kukubaliana kwamba sisi pia tunaweza kuongoza. Huu ni wakati wetu wa kuifanya Kenya kuwa taifa bora zaidi," alisema.

                                         

Mbunge wa Likoni, Mishi Mboko, alimshukuru Wetang'ula kwa ushauri na uongozi wake, akisema atarudisha wema huo kwa wakati unaofaa.

"Sisi ni matokeo ya malezi na mwongozo bora. Tumeazimia kwamba wakati utakapofika, nasi tutawaunga mkono wale waliotunyanyua. Kwa pamoja tunaamini kuwa taifa letu liko kwenye njia sahihi kuelekea ustawi," alisema.

                                         

 


Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more