Ofisi ya Msajili wa Vyama vya Kisiasa Yawapa Walemavu Mafunzo ya Masuala ya Uchaguzi.


                                                             
Ofisi ya Msajili wa Vyama vya Kisiasa nchini imeandaa mafunzo maalum ya maandalizi ya uchaguzi kwa walemavu katika Kaunti ya Mombasa, yakilenga kuwajenga uwezo, kuwafahamisha haki zao na kuongeza ushiriki wao katika mchakato wa uchaguzi.

Akizungumza wakati wa mafunzo hayo, mratibu kutoka Ofisi ya Msajili wa Vyama vya Kisiasa katika kaunti ya Mombasa Suzan Mwaingo amesema lengo kuu ni kuwahamasisha walemavu kujiunga na vyama vya kisiasa na kufahamu namna wanavyoweza kupata nafasi za uongozi kupitia uteuzi wa vyama.

Akisema ofisi hiyo imejipanga vyema kuelekea Uchaguzi Mkuu wa 2027 na imeendelea kushirikiana na Tume Huru ya Uchaguzi na Mipaka (IEBC) kutoa elimu kuhusu sheria za uchaguzi na umuhimu wa kuzingatia sheria hizo ili kuepuka adhabu.

Suzan amebainisha kuwa vyama 48 kati ya 96 vilivyosajiliwa nchini vimekidhi vigezo vya kupokea fedha kutoka Mfuko wa Vyama vya Kisiasa unaolenga kuunga mkono makundi maalum, wakiwemo walemavu. 

                                                 

Aliwahimiza walemavu kujiunga na vyama vya kisiasa ili waweze kunufaika na fursa na rasilimali zinazotolewa kupitia mfuko huo.

Kwa upande wake, msimamizi wa data katika Ofisi ya Msajili wa Vyama vya Kisiasa,Josphat  Nyongesa, amesema mafunzo hayo yanaonyesha dhamira ya pamoja ya kuimarisha ushiriki jumuishi katika uchaguzi na siasa.

Amesisitiza kuwa walemavu wana haki ya kushiriki kikamilifu katika michakato ya kidemokrasia, ikiwemo kupiga kura, kuwania nyadhifa za kisiasa na kushiriki katika maamuzi ya kitaifa.

Nyongesa amesema matumizi ya teknolojia yamekuwa nyenzo muhimu katika kuimarisha ushiriki wa walemavu kupitia vifaa saidizi, majukwaa ya kidijitali na mitandao ya kijamii. Akiweka wazi kuwa teknolojia imechangia kurahisisha upatikanaji wa huduma na taarifa za uchaguzi kwa walemavu.

Amewataka walemavu kutumia mitandao ya kijamii kwa njia chanya ili kupata taarifa sahihi, kutetea haki zao, kubadilishana uzoefu na kuimarisha ushiriki wao katika masuala ya demokrasia.

                                               

Maafisa hao pia wamesisitiza umuhimu wa vyama vya kisiasa kuzingatia sheria na kuhakikisha walemavu wanapata haki zao, hasa katika mchakato wa uteuzi wa wagombea.

Naye mmoja wa washiriki wa mafunzo hayo, Jemyma Kutata, amesema mafunzo hayo yatawasaidia kuelewa haki zao na namna wanavyoweza kunufaika kupitia vyama vya kisiasa.

Ameitaka Ofisi ya Msajili wa Vyama vya Kisiasa kuhakikisha sheria zinazowalinda walemavu zinatekelezwa kikamilifu ili waweze kufaidika na fursa zilizopo.

Akiwahimiza walemavu kujitokeza kuwania nafasi za uongozi kupitia uchaguzi badala ya kusubiri uteuzi, akisema wana uwezo wa kushindania na kushinda nyadhifa mbalimbali za kisiasa.

Aidha, ameiomba IEBC kutenga huduma na maeneo maalum kwa watu wenye ulemavu wakati wa usajili wa wapiga kura na siku ya kupiga kura ili kuepusha changamoto za kupanga foleni, ambazo mara nyingi huwasababishia usumbufu na kuwafanya wajihisi kutengwa.

                                             

Pia ameitaka Ofisi ya Msajili wa Vyama vya Kisiasa kushirikiana kwa karibu na time ya IEBC ili kuhakikisha walemavu wanapata haki yao katika uteuzi wa vyama vya kisiasa, badala ya nafasi hizo kutolewa kwa watu wasio na ulemavu.

Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more