Maadhimisho ya Siku ya Mtoto mwafrika: Viongozi Kilifi watoa Wito wa Kulinda Watoto.

 

                                                      

Viongozi wa Kaunti ya Kilifi wametoa wito kwa jamii kushirikiana katika kuimarisha ulinzi wa watoto na kuhakikisha wanapata haki zao za msingi, ikiwemo elimu, huduma za afya, maji safi na mazingira salama ya kuishi.

Wakizungumza wakati wa maadhimisho ya Siku ya Mtoto wa mwafrika, viongozi hao walisisitiza kuwa jukumu la kulinda watoto si la serikali pekee, bali ni wajibu wa kila mwanajamii.

                                                         

Akiongea katika hafla hiyo naibu Gavana wa Kilifi, Flora Chibule, amesema maadhimisho hayo yanatoa fursa ya kutafakari wajibu wa pamoja wa kulinda, kulea na kuwekeza kwa kila mtoto ili kuhakikisha anafikia ndoto zake.

Akiangazia kaulimbiu ya mwaka huu, “Kuhakikisha Kila Mtoto wa mwafrika Anapata Huduma ya Maji Safi, Usafi wa Mazingira na Afya ya Usafi,” Chibule amesema upatikanaji wa maji safi ni haki ya msingi inayostahili heshima na utu.

                                             

Alieleza kuwa ukosefu wa maji safi na huduma bora za usafi wa mazingira huwanyima watoto muda wa kujifunza na kuwaweka katika hatari ya maradhi, unyanyasaji na ukatili wa kijinsia wanapolazimika kutembea umbali mrefu kutafuta maji.

Chibule ameonya kuwa changamoto kama biashara haramu ya watoto, unyanyasaji wa kijinsia, mimba za utotoni, mila potofu, umaskini na migogoro ya kifamilia zinaendelea kuhatarisha ustawi wa watoto katika kaunti hiyo.

“Mtoto wa mwenzako ni mtoto wako. Ulinzi wa mtoto huanza pale jamii inapochukua hatua za kuhakikisha usalama na ustawi wa watoto wote,” alisema.

Kwa upande wake, Afisa wa Watoto wa Kaunti ya Kilifi, Kelvin Mugambi, aliwataka wazazi, walezi na wananchi kwa ujumla kuripoti kwa wakati visa vyote vya dhuluma na unyanyasaji dhidi ya watoto ili wahusika wachukuliwe hatua za kisheria.

                                                   

Mugambi amesema serikali ya kitaifa na ile ya kaunti zinapaswa kuendelea kuwekeza katika mazingira salama kwa watoto pamoja na kushughulikia changamoto za upatikanaji wa maji katika maeneo yenye ukame ili watoto wapate fursa ya kuhudhuria masomo badala ya kutumia muda mwingi kutafuta maji.

Naye Waziri wa Vijana, Michezo na Huduma za Jamii, Dr Ruth Dama Masha, aliwataka wazazi na walezi kuimarisha mawasiliano na watoto wao na kuwapa ushauri nasaha ili kuwasaidia kukabiliana na changamoto mbalimbali, ikiwemo afya ya akili na msongo wa mawazo.

                                                      

Ruth pia aliwahimiza watoto kujiepusha na matumizi ya mihadarati, akisema kuwa yana madhara makubwa kwa afya na yanaweza kuharibu ndoto na mustakabali wa maisha yao.

Viongozi hao walisisitiza kuwa Serikali ya Kaunti ya Kilifi itaendelea kushirikiana na wadau mbalimbali kuimarisha mifumo ya ulinzi wa watoto, hususan wale wanaoishi na ulemavu, na kuhakikisha watoto wote wanapata fursa sawa za kutimiza ndoto zao.





Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more