Kenya yathibitisha Kuimarisha Usalama wa Baharini Katika Mkutano wa 4 wa Kamati ya Uongozi ya IORIS,Mombasa.

                                                       


 Kenya imethibitisha dhamira yake ya kuimarisha usalama wa baharini na ushirikiano wa kimataifa wakati wa ufunguzi wa Mkutano wa 4 wa Kamati ya Uongozi ya Jukwaa la Indo-Pacific Regional Information Sharing Platform (IORIS) unaofanyika Mombasa.

Washiriki wanatarajiwa kujadili changamoto mbalimbali za usalama wa baharini ikiwemo uharamia, wizi wa kutumia silaha baharini, uvuvi haramu usioripotiwa na usiodhibitiwa (IUU), pamoja na utupaji wa taka na kemikali hatari katika mazingira ya bahari.

                               

Waziri wa usalama wa ndani Kipchumba Murkomen amesema kuwa bahari imekuwa mhimili muhimu wa biashara ya kimataifa kwa karne nyingi, zikichangia ukuaji wa uchumi wa mataifa mbalimbali. Hata hivyo, migogoro inayoendelea katika Mashariki ya Kati imeonyesha jinsi usumbufu wa njia za usafiri wa baharini unavyoweza kuathiri uchumi wa dunia na maisha ya watu wengi.

Amesisitiza kuwa ushirikiano wa kimataifa na ubia kama ule unaoendelezwa kupitia mkutano huo ni muhimu katika kulinda rasilimali za pamoja za baharini na kuhakikisha biashara ya kimataifa inaendelea bila vikwazo.

                                         

Kenya pia ilitoa shukrani kwa Umoja wa Ulaya kwa ushirikiano wake wa muda mrefu katika kuimarisha usalama wa baharini kupitia miradi ya kujenga uwezo na kutoa suluhu za vitendo dhidi ya vitisho vya baharini.

Kupitia mpango wa CRIMARIO, taasisi mbalimbali za Kenya zikiwemo Jeshi la Wanamaji la Kenya, Huduma ya Walinzi wa Pwani ya Kenya, Mamlaka ya Bandari Kenya, Mamlaka ya Bahari Kenya pamoja na Kamati ya Kuratibu Operesheni za Udhibiti wa Mipaka (BCOCC), zimekuwa wanachama hai wa jamii ya IORIS.

Jukwaa la IORIS limechangia kwa kiasi kikubwa kuboresha mawasiliano na ubadilishanaji wa taarifa muhimu kati ya taasisi za usalama wa baharini, hivyo kuimarisha ufuatiliaji wa maeneo ya bahari na usalama wa njia za usafiri wa majini.

Maswala mengine yaliyo angaziwa ni maendeleo ya programu ya simu ya Usalama Baharini, iliyobuniwa kwa ushirikiano kati ya Huduma ya Walinzi wa Pwani ya Kenya na CRIMARIO. Programu hiyo imeunganishwa na mfumo wa IORIS na inawawezesha wavuvi pamoja na watumiaji wengine wa bahari kupata taarifa muhimu za usalama na tahadhari kwa wakati.

                                            

Maafisa hao walisema teknolojia hiyo imeongeza uwezo wa Huduma ya Walinzi wa Pwani ya Kenya kufuatilia shughuli baharini na kutoa mwitikio wa haraka dhidi ya vitisho vya kiusalama.

Kenya imesisitiza kuwa iko tayari kuendelea kushirikiana na mataifa na wadau wengine katika kupambana na vitisho vya baharini na kuhakikisha uhuru wa usafiri wa majini unaendelea kulindwa.

Washiriki wa mkutano huo wamehimizwa kutumia fursa hiyo kutathmini mafanikio yaliyopita, kujifunza kutokana na changamoto zilizojitokeza na kuweka mikakati madhubuti ya kuimarisha ushirikiano wa baharini siku zijazo.

                                           

Mkutano huo wa siku tatu umeandaliwa kwa ushirikiano kati ya mpango wa Critical Maritime Routes Indo-Pacific (CRIMARIO) unaofadhiliwa na Umoja wa Ulaya na Huduma ya Walinzi wa Pwani ya Kenya (KCGS) na umewaleta pamoja wadau wa sekta ya bahari kujadili njia za kuimarisha usalama wa bahari na ushirikiano wa kikanda na kimataifa.

Mkutano huo unatarajiwa kuhitimishwa kwa mapendekezo yatakayosaidia kuimarisha utawala wa bahari, ushirikiano wa kiusalama na ubadilishanaji wa taarifa katika ukanda wa Indo-Pacific na kwingineko duniani.


Comments

Post a Comment

Popular posts from this blog

Viongozi wa Kidini PPRL Waunga Mkono Agizo la wizara ya elimu la Ratiba ya Masomo Shuleni

Image
          Viongozi wa kidini wa Pwani Patriotic Religious Leaders (PPRL) wakiongozwa na Mwenyekiti wao Sheikh Abu Qatada, wameunga mkono na kupongeza agizo la Waziri wa Elimu Julius Migosi Ogamba kuhusu kufuata muda rasmi wa masomo shuleni. Kwa mujibu wa agizo hilo, masomo yanafaa kuanza saa mbili asubuhi na kutamatika saa tisa na nusu alasiri. Sheikh Abu Qatada amesema viongozi wa kidini na wazazi wamekuwa na wasiwasi kuhusu mzigo mkubwa wanaobebeshwa wanafunzi kwa kulazimika kuondoka nyumbani mapema alfajiri na kurejea jioni.          Amesema muda mwingi ambao wanafunzi hutumia shuleni umekuwa ukiwanyima fursa ya kukaa na wazazi wao, huku walimu wa madrasa pia wakikosa muda wa kutosha kuwafundisha elimu ya dini ya Kiislamu na maadili mema. Amesema ni muhimu watoto kupata elimu ya shule pamoja na elimu ya dini, akisisitiza kuwa hata kama mtoto atafanikiwa kuwa kiongozi au kufanikiwa kimaisha, bila kuwa na maadili...
Read more

Mbunge Feisal Bader Atuhumiwa Kuzuia Msambweni Talent Show Kufanyika Mvindeni Youth Centre.

Image
    Waandalizi wa Msambweni Talent Show wamemtuhumu Mbunge wa Msambweni, Faisal Badar, kwa kuzuia matumizi ya Mvindeni Youth Opportunity Center, ambako hafla hiyo ilikuwa imeratibiwa kufanyika. Mmoja wa waandalizi wa shughuli hiyo, Hassan Madzaya, amesema walifika mapema na walikuwa wamelipia ukumbi huo, lakini walizuiwa kuingia kwa madai kuwa mbunge huyo aliwaelekeza wasimamizi kuwazuia na kutoruhusu shughuli hiyo kufanyika hapo. Iliwalazimu waandalizi kuweka mahema na viti nje ya kituo hicho, na hafla ikaendelea kama ilivyoratibiwa.         Hassan amesema mpango huo unalenga kukuza vipaji vya vijana katika soka, muziki, ushairi, uandishi wa habari na utengenezaji wa maudhui ya kidijitali, pamoja na kuwasaidia vijana kupata kipato kupitia uchumi wa kidijitali. Akisema kitendo Cha kuwazuia kuingia katika kituo hicho si Cha kiungwana na kinaregesha nyuma juhudi za vijana kutizima ndoto zao kupitia vipaji. Mwaniaji wa kiti Cha ubu...
Read more

Kaunti ya Wajir yaandaa Sherehe za Madaraka Day kwa mara ya kwanza tangu Kenya ipate Uhuru.

Image
  Kaunti ya Wajir imeandika historia kwa kuandaa sherehe za 63 za Madaraka Day kwa mara ya kwanza tangu Kenya ipate uhuru. Serikali imesema hatua hiyo inaonyesha dhamira ya kuhakikisha maendeleo na shughuli za kitaifa zinafikia maeneo yote ya nchi huku zikikuza umoja, usawa na mshikamano wa kitaifa. Akizungumza katika mkutano na wanahabari kuelekea maadhimisho hayo, Msemaji wa Serikali, Isaac Mwaura , amesema kuwa tukio hilo linaonyesha dhamira ya serikali katika kukuza ushirikishwaji, usawa na mshikamano wa kitaifa. Alibainisha kuwa licha ya changamoto za uchumi wa dunia, ikiwemo athari za mgogoro unaoendelea Mashariki ya Kati, uchumi wa Kenya umeendelea kuwa thabiti na hivyo kuwezesha serikali kuendelea kuwekeza katika maendeleo na umoja wa kitaifa.                    Maandalizi ya sherehe hizo yameleta mabadiliko makubwa katika mji wa Wajir, ikiwemo ujenzi wa uwanja wa kisasa wenye uwezo wa kuhudumia zaidi ya watu 10,000, ubo...
Read more